旺記的懷舊書展 (六)

20 九月

和朋友談及 NS,腦振盪下憶起半導体興衰史。Solid State IC 的老大哥是 Fairchild , 譯仙童,行內戲稱廢柴。Fairchild 興起得很快,也跌得很急,興起源於天才設計師 Bob Widlar 的 opamp uA702 ,比同代產品起碼超前了十年,吾生也晚,是先認識了741,然後709,才知道有702。手上還有一枚 鐵殼uA709, 70年末在鴨記買,那時已經是 cheap 嘢,但uA702 一出時(around 1965年)賣 200美元一枚,可想像 Fairchild 賺幾多,在科技行業裡,往往係一兩個人定生死,因為 creativity 可遇不可求。旺記見過好多人以為用 system engineering 將公司規格化,以為會perform得更 consistent ,係冇錯嘅,不過 end up 係 stagnant water,卜到直。

旺記一直同NS頗有緣,後生時用 一大堆 Audio IC LM381 , LM387 , LM1894, LM3915, LM394 , LM833 etc etc 唔在講,因為當時 NS 在港有個 design center ,同佢地有不少來往, 老牌子嚟講NS算硬淨 , 不若 Fairchild , 已面目全非,burr-brown 收歸 TI ,RCA 蒸發咗,Motorola 更唔駛講,分咗做 On 同 Freescale 已經冇乜 令HiFi友感興趣的產品 。

NS LM381 series 係 NS 專登整俾 audio 用既誠意之作,要知道七幾年時,大圍用嚟用去都係 741, 4558 ,Bi-FET 都未有,只恨 LM381 生不逢時,冇幾奈 Signetics 就出咗獨步天下的NE5534。

要說NS 最燒的古董,一定是 LM394,這枚孖管,原本係NS用嚟 demonstrate 佢既 bipolar fab process 有幾堅,估唔到LM394被發燒圈寵幸,用於 phono stage 和要求 low dc drift 的 discrete opamp 裡。所以依家 LM394 仲出緊,旺記唔明點觧冇semicon 廠出孖 Fet ? 將fet input 嘅 opamp個 input stage 抽出嚟就係咁多,好過D hifi友周圍揾孖 FET,仲做就咗某強國 D fake 原子粒散開咗去全球。

貴到無倫的Boulder ,就係用LM394H。

廣告

旺記的懷舊書展 (五)

13 九月

過去的數週是令全港人又痛心並同心的日子。
每逢遇着些大事故,總是令旺記愈加相信,香港人是卓越的(是因為百年殖民地的成果又如何?),東方之珠發不發光也不是最重要的,反正就是有情操。

NS 的 application notes 輯成的書,在80年代出版。

學習 analog 的人,此書不可少。祇是到了今天,學習 analog也成為了絕學,或也是懷舊。现在大學唸電子的,不要說分立元件的電子線路,連 opamp砌的電路都隨時攪到頭昏腦脹。這倒是旺記的第一手經歷,數月前和一個某大學畢業做事近十年的高材生閒聊發现的。旺記隨手畫了一個 amp 的線路出來,高材生看着只管抓頭,忙說opamp 的電路還可處理。

不打緊,反正還把玩 analog 的,都是老鬼,連 chip amp 都給 數字功放趕絕了,人的耳朶既壞了,還可以怎樣 ?

這本 app notes 旺記大概在86~87年間在信和地庫買的,那時信和有兩間電子零件店,有一間的老闆大概在理工畢業的,另一間取得當時名不經傳的三星半導体做代理,數年間翻了數翻,90年代在港交所上市。

這本書好像在去年(或 2008年)再版。有没有參考價值 ? 看官自行決定。旺記隨手翻到一頁,嘿你道是啥,不就是萬千寵愛的 B1 嗎 ?

旺記的懷舊書展 (四)

17 八月

當年萬里出的書,差不多是它出一本,旺記就啃一本 ,這本於1980年出版,算是較後期的了,大概到了80年代初萬里不再編譯日本電子書,是令人有點失望。

這本書以日立的lateral MOSFET為主打,當年lateral MOSFET剛剛推出幾年,英光電藝社賣 2SK134/J49 45蚊1對,Mot記 2N3055/MJ2955 才9蚊1對。


這個基本上就是日立推MOSFET的 application circuit ,清一色的 Hitachi 管,2SA872/C1775 是日立最少Cob 的管,東芝A970/C2240輸足一條街, 2SB715/D755則是日立專門開發來推MOSFET的中功率管,這股追求完美的豪氣,在90年代後一去不復返,行文之時,報章上話中國已取代日本成為第二大經濟國家云云。那麼在創造和開發能力上,中國排第幾 ,還是只靠人山人海的勞動力來支撑經濟數據?

雙差動的電路,旺記認為是最善用solid state特性 的 solid state design 了。商品中最好 amp ,不出這個基本結構。留意輸入的 JFET,是耐壓80V的絕種貨,近年當日本原子粒係寶的老美如NP大概揩都未揩過。
看着這些美好的元件逐漸消失,是頗無奈的。之但係想到求其一個AX7(甚至國產 6N3)都揮低一大堆原子粒時,又覺得呢D元件都是留在美好的記憶裡算了吧。

旺記的懷舊書展 (三)

9 八月

今年沒去音展。
對一個玩HiFi卅年的人來說,提不起勁去睇一D大路嘢,應該算係 well justified 吧!其實以前旺記必去音展,但不是這個,而是另一個在酒店攪的。旺記一直對個D大代理推的嘢没太多興趣,反而D小小小企,會有另類趣味。在會展的音展,基本上似一個名店街多一D。
所以,雖然個本雜誌自食其果已經係喪屍一件,但當年佢係凝聚咗一D cults,依家再揾唔番。

如果有個懷舊音展,肯定旺塲許多。

呢本書,應係旺記玩電子最早五本書之一。
但絕不是最 enjoy的一本。同系有一本叫"看圖學裝收音機",印刷精美許多,當年旺記日睇夜睇,因為基礎唔夠一知半解,所以睇極都停响依樣畫葫蘆的階段。

最 primitive 嘅礦石機,當年覺得好神奇。

用番鹼盒做機殼,在日本製作中非常 common,不過實在太娘,旺記都冇咁 implement 過。

旺記個陣最不滿的是,成本書有一半是以下呢堆咸豐年嘅嘢,覺得萬里書店好揾笨。

如果個陣旺記知道呢D係寶,一路收集,發咗啦。
不可不知,radio technology 依家仲间中有刊載膽收音線路。
兜了一個大圈之後,旺記必須承認,真空管係最natural 嘅放大器件。

旺記的懷舊書展 (二)

4 八月

旺記曲線認識 ST-120係始於 Hafler DH200,當年電聲界為了引入DH200套件,攪咗個 Dynaco 回顧,講到ST-120,旺記望住個線路,睇到出神,從此就成日想將佢復刻。玩 Hifi 唔識 David Hafler 絕對係一個罪,Hafler創立 Acrosound ,Dynaco ,promote 四聲道,賣盤,五十幾歲再創業,七十歲先收山賣盤(令一個例子係 E J Jordan,永不言休),相比今日好多香港人話要四十幾歲退休,financial independent ,週圍玩過埋個幾廿年,一D venture 精神都冇。By the way, 我想起2008年有個七旬老翁,俾馬多夫扼晒D錢,咁去超市做sales,見佢攞住D一包包食物响度做 product promotion,訪問中佢老婆話 : We’ll have a better tomorrow ! 令人動容。

講番 Hafler ,Dynaco 年代揾咗 Borbely 攪設計,食髓知味,揾 Borbely 再攪 DH200同 DH101 ,再下一城,不過Borbely唔睇好Hafler的營運,冇幾奈就quit咗,DH200同之後嘅DH500賣到成行成市後 ,Borbely俾佢老婆省到飛起。

再講番 ST-120,線路簡潔,旺記對佢有興趣過 DH200多多聲,gut feeling 如果D 零件(特別係兩件 coupling cap)用好D,應該唔太差。網上好多人話 ST120五十蚊(美金)都唔值,由此可知internet 之上無知人仕比例遠大如識嘢嘅人,而且向來係樽愈空愈響也。

旺記的懷舊書展 (一)

27 七月

一年容易又書展。

旺記好耐冇去過香港書展了, 自從可以作 internet 閱讀和網上 order 書之後, 連逛書店都少了許多, 去書展仲要俾錢買飛,同人鬥迫,係好奇怪的事 。

今年可堪玩味之事是着多衫的可以开簽名会,着少衫的就唔得,旺記一D都唔支持娜姐一族嘅出版事業,但呢個係 free market,除非你一早有 rules set 好哂,臨門先嚟落閘,係包青天式秉行公義,violate 公平營商原則,在资本主義社会,講唔通。慘得過有十三歲少年話摼咗三個月零用錢去買娜娜本書(講白D, 跟本係咸書),你越 censor 佢越 high,要攪好讀書風氣唔係靠 censorship。

呢排執拾舊嘢,把十幾箱書抖了出來,又係一陣 mix feeling ,those were the days。

收集呢本書只有一個原因,就是裡面有篇 Dynaco ST-120 的復刻。廿幾年前冇internet,咁嘅文章就喺寶。

NP 的朝聖之旅

18 五月

最近 First Watt 的 website 更新了, 一看, 赫然( 可能已出了好耐, 但旺記好背)看見一款叫M2的功放, 往裡一看, 哈, interstage 用了 autotransformer !
除了十足十胆機思維的 M2外, 還有一款B5的小東西, 專門用來玩全音障板加低音 !

不可不知,50年代以降的石機, 是從胆機的 architecture 照搬過來, 用 transistor 去 implement 而已,所以, 第一, 二級必然是 single ended , 然後加個 IT 交連到 power stage,這種 design,到了70年代消失殆盡, 因為D人發覺 原來用 operational amplifier 的 architecture( 用胆做 opamp 由來已久, 唔好以為 opamp 即 IC, opamp 係 n 種 amplifier topology 之一而已) 做 audio amp 平好多, 因為 transistor 有N又有P, dual rail 做 dc coupling 無往而不利, market driven大前題下, 大家於是投入無 LTP不歡的 design。

NP就係响咁嘅大時代攪amp design,所以佢早期的 design, 同同期D major designs 其實係同一個思維。在日本有類似的情況,打開 D circuit album , 70年代的石機都係處博命用 discrete 砌 opamp,呢度加個 current source, 嗰度又加個 current mirror,一部機用二三十粒transistor係閒事。不過到咗80年代開始逆轉,LTP 少人用咗, 呢D思維由 Hiraga 帶到歐洲,Borbely 接住上, 但Borbely 玩慣 IC ,D design 拋唔開 IC的設計手段,但這或者同佢用乜喇叭有關,從一些蛛絲馬跡來看,他大概用不超過 90dB的多路, 是另一個世界的玩意。

講番NP, 現在情況已經頗清楚,First Watt 是 NP 從石機蛻變的平台,只是NP不會蠢到用胆砌機, 雖然他明知胆好聲(佢唔會講得好白嘅,但細心D讀就知佢仰胆之情),他會跟人说這是 kitchen table 的手作仔, 係, 冇錯, 不過 Sakuma D胆機一樣係手作仔,咁即係點 ? 這是一種文化, think small, 简約, diy feel, 細瓦功放, 全音单元, all converge to 與世無爭,叩門就給你開門的音樂世界。